रास्वपाको पहिलो चितवन महाधिवेशनमा २५ सय प्रतिनिधि सहभागी हुने

इटहरी ।  राष्ट्रिय स्वतन्त्र पार्टी (रास्वपा) ले पार्टीको पहिलो महाधिवेशन आगामी असार ७ गतेदखि चितवनमा आयोजना गर्ने निर्णय गरेको छ ।

बुधबार बसेको केन्द्रीय समिति बैठकले पार्टीको स्थापना दिवस पारेर पहिलो महाधिवेशन असार ७, ८ र ९ गते चितवनमा गर्ने निर्णय गरेको नेता प्रकाशचन्द्र परियारले बताए ।

बैठकमा पार्टी सभापति रवि लामिछानेले महाधिवेशनसम्बन्धी प्रस्ताव पेश गरेका थिए । महाधिवशेनको मिति तय भएसँगै पार्टी केन्द्रीय समिति आयोजक समितिमा रूपान्तरण भएको छ ।

केन्द्रीय समिति बैठकले महाधिवेशन सम्पन्न गर्न विभिन्न उपसमिति गठन गरेको छ । महाधिवेशनमा ७७ वटै जिल्लाबाट कम्तीमा २५ सय प्रतिनिधिहरुको सहभागिता हुने अनुमान गरिएको नेता परियारले बताए ।

बैठकले जेठ २६ गते बागमती प्रदेश, २७ गते कोशी प्रदेश, २८ गते मधेश प्रदेश, २० गते गण्डकी प्रदेश, ३० गते लुम्बिनी प्रदेश, ३१ गते कर्णाली प्रदेश र असार १ गते सुदूरपश्चिम प्रदेशको अधिवेशन तय गरेको छ ।

त्यस्तै पालिका अधिवेशन पनि आयोजना गर्ने तयारी भएको भन्दै परियारले पालिका अधिवेशन हुन नसकेको खण्डमा अहिलेको पालिका संयोजक नै महाधिवेशन प्रतिनिधि हुने व्यवस्था गरिएको बताए ।